Në zonën e të Mirave detare në Ulqin do të investohen afro 600.000 Euro

Kryetari Cungu dhe bashkëpunëtorët e tij së bashku me përfaqësuesit e NP për të Mirat detare kanë vazhduar bisedimet rreth planeve dhe projekteve për vitin 2014. Në vitin e ardhshëm në Ulqin, në zonën e të Mirave detare do të investohen afro 600.000 Euro, nga shuma e përgjithshme prej 800.000.
Pas vizitës së përbashkët të Ranës, Kacemes dhe Mandreqit, janë shqyrtuar prioritetet dhe mundësitë e realizimit të projekteve të caktuara në kuadër të investimeve të parapara.

Për shkak të mos funksionimit të Kacemes, të pranishmit ranë dakord që krahas mënjanimit të rërës dhe thellimit të Kacemes, është e nevojshme që të bëhen dhe hulumtime të caktuara me qëllim të gjetjes së zgjidhjes për pendën në këtë pjesë. Ata gjithashtu vlersuan që është e nevojshme të punohet studimi i fizibilitetit për tërë Ranën duke përfshirë Kacemen dhe Mandreqin. Projekti tjetër i rëndësishëm është rregullimi i Mandreqit me qëllim që t’u mundësohet peshkatarëve nxjerrja e varkave në këtë vend. Projekti i rregullimit të Moles së madhe dhe të vogël, vlera e të cilave kapë shumën prej 800.000 Euro do të realizohet në faza, njëra prej të cilave do të realizohet vitin e ardhshëm.

Në takim poashtu u fol për krijimin e kushteve për anijet turistike për t’iu ofruar bregut në plazhin e madh në atë mënyrë që Komuna e Ulqinit të propozojë disa lokacione për ankorim. Shqyrtimi i situatës së objekteve të përkohshme në Plazhin e madh me qëllim që të krijohen kushtet për nënshkrimin e kontratave me qiramarrësit e plazheve pa vonesa, problemi i shtëpizave të peshkatarëve në Bunë si dhe projekti i kanalizimit dhe ujërave të zeza për objektet në Bunë, rregullimi i Mandreqit në Valdanos si dhe plazhi i Valdanosit, shtegu i këmbësorëve dhe muri mbrojtës në Pyllin e pishave si dhe shumë projekte të tjerë, gjithashtu kanë qenë tema të këtij takimi.

Komuna e Ulqinit